Wylofain

Cerdd i Haiti

Wylofain
 
Er mwyn y cread sy’n crynu'n ei groen fel creadur
Er mwyn gwaedd yr haul wrth ddryllio calon y ddaear
Er mwyn y plas marmor drodd yn furddun fel plu eira
Er mwyn yr ysbyty, mynwentydd o feddau gwyn
Er mwyn yr eglwys gadeiriol drodd yn wagle’n ei chwman
Yn eiriol ar ei gliniau yn wylofain ar Dduw
Er mwyn y salmau dwys, gweddïau’r byw a’r meirw
Er mwyn y tai sy’n garnedd : o’r crud i’r cwpan sy’n deilchion
Dysglau faluriwyd rhwng dalennau'r meini
Er mwyn yr ysgyfaint a’r ysbaid o aer sy’n rhoi gobaith
Er mwyn y dwylo deifiol yn y düwch all ryddhau
Er mwyn  hoen-lithriadeinioes sy’n methu dal gafael
Er mwyn  gwawrddydd a wenodd ar wyneb y wraig
Er mwyn ei merch a drengodd  yn y gwyll
Er mwyn sgradan baban a aned o’r anghyfannedd
Er mwyn y gweithwyr a ddaw a’u cafn morter o friciau
Er mwyn atgyfodi muriau yfory o’r gladdfa
Dros baderau yr esgyrn sychion.
 
Menna Elfyn
 
(Cyfieithiad o gerdd Saesneg Gillian Clarke).
 
I ddarllen y gerdd yn Saesneg , cliciwch yma.